Oul hants

A fun maesel switherin tha ither dey aboot whaur A come frae an tha toonlans roon aboot. Noo toonlans wur yin thing that gein ye an identity an yoked ye tae somewhaur ye cud alwyes caa hame.
By The Newsroom
Published 5th Jul 2015, 08:14 BST

Aff coorse tha pooers thaut be thocht postcodes wur tha wye forrit an lakely tha post carriers wud agree. But A think its naw tha saim whun yer lukin baak tae sae A wus boarn at BT53 ir tha lake. Onywye A wus boarn at Benverdin in a cottar hoose on a wee brae up frae jest ayont tha Orange Haa. It luks a gran hoose noo-a-deys but in them deys it had nae electric licht, nae rinnin watther an aff coorse it had a dry outside closet.

It wus whaur A wus boarn in mae grannies hoose, but it wus in better shape nir a brev wheen o tha hooses A leeved in roon aboot Noerth Entrim.

Hide Ad
Hide Ad

Noo mae granny wus caretaker o Kilmail School jest doon tha road fare fornenst tha Haa, och its awa noo tae tae bigger an betther up tha road a bit. As far as a know she had tae gae doon in tha mornin an licht tha fire thaut wud hae het tha school room, bring in a bucket fresh watther an in tha evenin brush tha place o larnin oot.

Mae granfeytherin his younger deys wus a plooman tae yin o tha fermers up tha road tae he got hurted an tane poorly wae paralysis an wusnae able tae work agen. Hooiniver am naw gantae scunner yese wae ony mair blethers aboot maesel but A am gantae taak Benverdin Big Hoose an its gerdens. A tane a wee scoot in tha ither dey an mann A wus weel tane on wae tha place an whuther ye hae ony connections tae Beverdin ir naw, tak a wee run in. While dannerin roon aboot a come fare fornenst a wudden bear near tae tha Victorian brig thaut gaes ower tha river Bush.

Mae thochts tane me awa bak tae switherin aboot whaut it micht hae bane lake for some o mae far oot femilie wha worked aboot tha big hoose roon aboot tha first war. These thochts sorta gein me a link tae tha hale place an a sut in tha garden alang wae mae thochts o Benverdin tha place A wus boarn.